图：CY话钟意煮下嘢食，除咗会自己包水饺，亦会自制葱油饼\资料图片
文|郑晴
山东菜以浓少清多、醇厚不腻见称，着名嘅风味菜点包括山东煎饼、长官包子、周村烧饼同盘丝饼等。不过，特首梁振英（CY）就最钟意食山东韭菜水饺。佢日前接受《都市日报》嘅“都市会客室”专访，仲同专访佢嘅主持人一齐到礼宾府嘅“热厨房”煮山东韭菜水饺添。至于被主持问到钟唔钟意食龙虾呢？CY就即时话好钟意喎。
政府施政有成效
曾多次讲过自己钟意下厨嘅CY喺专访中仲话，自己每隔几个月就会到厨房煮嘢食，除咗会自己包水饺之外，亦会自制葱油饼。当年喺英国留学嘅时候，间中就会同一班香港留学生搞大食会，一人负责一道菜，而佢负责包嘅水饺都好受女同学欢迎咁话。至于讲到来届特首选举，CY就话，依家未系时候考虑连任嘅问题，但如果佢竞逐连任嘅话，一定会欢迎竞争。
另外，CY仲提到现时特区政府嘅政策对中产同基层都有利，所以无论下一届由边个做特首，相信下一届政府都唔应该脱离依家嘅政策轨迹。CY又话，今届政府得到管治团队、公务员支持，仲有社会嘅配合，确实做咗唔少实事，包括处理好房屋短缺问题，增加供应，令大家对政府嘅房屋政策有信心。
讲到早前立法会审议《医生注册（修订）条例草案》时，医学界议员梁家骝独力“拉布”拉倒有关《草案》，CY就话，香港唔系地球上唯一有政治嘅地方，特区体制同立法会表现都有佢哋嘅特殊性，而且“拉布”唔系由香港立法会发明，但喺70个议员入面，由一个议员就拉死一条咁重要、而且喺社会上得到广泛支持嘅《草案》，喺其他地方就无见过喇！至于政改嘅问题，CY就话依家关键系要立法会取得共识，得到三分之二或以上嘅议员支持，不过要取得呢项共识都唔容易。
宴请奥数赛筹委会
讲返食，CY寻晚发表网志，就话寻日礼宾府宴请第57届国际奥数竞赛香港筹委会及赞助人，仲衷心感谢筹委会主席岑嘉评同各位朋友嘅努力同付出，又话今次香港队喺109个国家同地区嘅参赛队伍中，以三金两银一铜嘅佳绩排名第九，刷新咗港队历来嘅最佳成绩，真系可喜可贺。CY仲话，今届特区政府积极推动STEM（Science,Technology,EngineeringandMathematics），即系科学、科技、工程同数学嘅教育，鼓励学生选修有关学科。同学们喺国际奥数竞赛中夺得好成绩，有助同学对STEM尤其数学嘅兴趣。CY讲到咁开心，唔知佢哋庆祝嘅时候有没食水饺呢？
阿Ben见证一条咸鱼的诞生
由一条鱼转变成一条咸鱼，到底要经历啲咩？唔系人生中嘅大起大落，而系室外露天嘅“一夜晴”。陈恒镔（Ben）寻日就入长洲探访，顺便就搵当地街坊请教点样腌制马友咸鱼。唔讲唔知，原来新鲜马友清理好鱼鳞内脏，抹埋盐之后，就要搵一个天晴嘅夜晚，将鲜鱼拿出室外风乾，等条鱼慢慢收水。如果情况理想，经过一晚，鲜鱼就会变身成为靓咸鱼。阿Ben知道之后，都不禁O嘴，笑住话原来咸鱼系经过“一夜晴”诞生嘅。佢最后，就引用咗星爷嘅经典对白：“人如果没梦想，咁同咸鱼有咩分别？”阿Ben嘅梦想，就真系好难估，不过讲到佢最近有咩目标，郑晴就话肯定就系争取连任啦。
郑晴提提你，陈恒镔已经报名参选新界西立法会选举，其他参选名单包括：梁志祥、麦美娟、田北辰、周永勤、何君尧、尹兆坚、郭家麒、黄俊杰、冯检基、黄润达、朱凯迪、黄浩铭、李卓人、汤咏芝、张慧晶、高志辉、郑松泰、吕智恒、邝官稳。
亚视员工：没阿彪可能饿死咗
一直为全港打工仔女生计奔波嘅工联会邓家彪，过去一年帮一班“欠薪累累”的前亚洲电视员工追讨赔偿，大家都“有眼睇”。连“亚视之宝”刘锡贤都大赞话：“如果没阿彪，我哋（亚视员工）好多人可能已饿死咗！”
阿彪日前喺Facebook分享咗段短片，片中刘锡贤讲返亚视员工嘅辛酸，佢大爆话亚视执笠嘅时候，好多议员口讲话为员工争取权益，“但其实见完我哋影完张相，就影都唔见埋，得阿彪一个由头跟到尾”，仲话如果唔系佢，今日员工仲活喺水深火热之中。阿彪就写下感言，分享自己追“薪”经验，认为只有团结劳工，集合打工仔力量，先可以坚守劳工权益嘅目标。
Chok如福山雅治
唔单止咁，阿彪仲喺Facebook上载咗张同队友曾劲聪、谭金莲一齐影嘅新相，企系中间既阿彪好认真托住个头，话要“齐剪布闯新路”。Chok得咁型，唔怪得连网民都大赞佢似日本男神福山雅治演嘅神探伽利略啦。
阿彪已经报咗名参选新界东，其他候选人仲有葛佩帆、陈克勤、容海恩、李梓敬、方国珊、林卓廷、杨岳桥、张超雄、范国威、侯志强、梁国雄、陈志全、麦嘉晋、廖添诚、黄琛喻、郑家富、陈云根、陈玉娥、李偲嫣、梁颂恒、梁金成。
扫描本文章到手机浏览
扫描关注新时社官方微信
