图：谭校长（右）认为奥运精英系中国人的骄傲
文 | 郑晴
奥运精英访港，唔好话市民争住要买飞睇表演，就连一班明星都要“追星”。见佢哋放上网嘅“集邮品”咁齐，郑晴都好“葡萄”呀！
左麟化身大粉丝
呢几日打开微博、facebook，几乎全部系奥运精英消息，更加见到难得“天文现象”─明星追星。谭咏麟（谭校长）就喺微博话“今午有幸与他们（运动健儿）聚餐，令几十年从没做过粉丝的我变了……大粉；毕竟他们是我们中国人的骄傲嘛！”
除咗谭校长，当日到酒店迎接一众健儿嘅仲有港区全国人大代表、爱国歌手张明敏。佢争住同郎平合照，仲自备排球攞签名，之后仲集齐全队女排成员嘅签名。当女排精神遇上“中国心”，真系激荡人心呢！
右李向世界恤发
有“左麟”，当然唔少得“右李”。李克勤早两日就喺礼宾府同一班世界级选手见面，出发前已经恤定发啦，“扮靓靓，等阵要去礼宾府见金牌运动员，兴奋！”完咗活动，佢仲上载咗差唔多十张相，“我自小便是运动迷，所以特别尊重运动员，国家队的，香港队的，有机会总是想多了解他们，甚至交个朋友。不要见我面上好像很镇定，其实内心很激动呀！”
当日同场仲有“宇宙最强”甄子丹，佢仲话：奥运英雄的辉煌成绩让每个中国人都值得骄傲！话明“宇宙最强”，其中一张相就系同奥运跆拳道金牌得主赵帅及郑姝音，握拳摆甫士合照，气势十足。不过，话口未完，另一张相甄子丹同傅园慧合照时，就唔觉意，一时唔小心，失手！被傅园慧打到个鼻呀！放心，系没人受伤。事缘合照一刻“洪荒少女”刚刚举高只手，而只手又喺正甄子丹鼻前，睇落仲以为武林高手甄子丹都畀人偷袭到添。
莫文蔚亦把握最后机会，前日同两位“男神”孙杨、张继科合照，仲话“欢迎两位金牌偶像到香港#奥运代表团访港#以后要常来啊”连个hashtag都顺便宣传埋香港，真系要畀个“赞”！
女排上演“中国好声音”
国家奥运精英寻日结束一连三日的访港行程，好多市民都依依不舍送行。民政事务局寻日下昼就喺facebook大派福利，独家播放中国女排喺旅游巴上演“中国好声音”嘅片段。一班美女开金口大唱内地歌手张杰嘅《年轻的战场》，尽展悦耳歌喉，“打得又唱得”，连民政局小编都忍唔住hashtag“#中国好声音”。
郑晴见到喺约分半钟嘅片段中，女排成员望住手机合唱，副歌时仲激昂地唱：“今天我终于站在这年轻的战场，请你为我骄傲鼓掌，今天我将要走向这胜利的远方，我要让这世界为我激荡”，回想起今届奥运女排嘅亮眼成绩，郑晴觉得成员好似用紧悦耳嘅歌声，宣告国家女排会继续努力称霸，叫世界为她们激荡。
临走仲系咁可爱
图：傅园慧与市民挥手告别新时社报记者麦润田摄
三日话咁快过去，国家奥运精英代表队寻日转到澳门访问，相信大家同郑晴一样依依不舍。咁多位运动员中，傅园慧嘅真性情赢得大家喜爱，寻日NOWTV就播出佢嘅专访，片中主持叫傅以广东话介绍自己，佢即刻笑说“我哪懂那么多”，然后佢再使出“洪荒之力”以半咸半淡嘅广东话，讲“你好”、“得唔得”同“阿SIR”，但原来佢唔知“阿SIR”系点解……主持话佢知系警察时，佢即刻呆呆地O咀“哦！”，十分搞笑。
嚟咗香港三日，傅园慧收到好多粉丝送嘅毛公仔，令佢好开心，仲话“他们都是我的新宝宝”。佢再次感谢港人对佢嘅支持同爱护，但幸福同时亦搞到佢好烦恼，佢话喺街上畀好多人认出，没以前咁自由。虽然近日爆红，但佢话希望大家更关注佢赛场上嘅表现，又希望体育与政治可以分开。最后佢又画一只猪仔送畀男主持，仲话：“真兄弟，讲义气，打鈎勾”，唔知佢地有咩秘密呢？
两代跳水皇后喜相逢
图：吴敏霞与郭晶晶（左）叙旧微博图片
匆匆访港三日，唔止市民唔够喉，一众运动员都意犹未尽。难得来港，乒乓球同跳水嘅金牌运动员，当然不能放过同两名“国宝级前辈”─国家前跳水代表郭晶晶、前乒乓球代表张怡宁叙旧嘅机会。寻晚两代“跳水皇后”郭晶晶同吴敏霞终于有时间聚会，吴敏霞系微博帖上两人合照，仲话：“我的郭姐出现啦！好难得见一次面呀！”真系睇相都觉得温馨。
另外，乒乓球手丁宁亦系微博上载多张相回味今次旅程，佢仲好高兴咁宣布终于见到朝思暮想嘅张怡宁，仲含羞答答咁讲：“真是想死我啦……可是我还有任务今天就要离开了[泪]只能等下次。”
本报奥运精英报道广受市民欢迎
内地奥运精英代表团嚟到香港就牵起全城热话，《新时社报》记者连日贴身追齐各个运动员同市民交流嘅情况，有关报道仲喺维园跳水表演场外同其他地区免费派发添。因为咁，无缘亲眼睇奥运男女神英姿嘅市民，就可从报道感受下现场欢乐气氛。
咁多靓相，奥运精英报道当然大受市民欢迎，好多人同郑晴一样，争相拎返份搵下自己心仪“老公”……吖唔系，系心仪运动员嘅报道。郑晴打开报纸就见到羽毛球好手林丹及谌龙、乒乓男神张继科、马龙，仲有中国女排等偶像“大神”，如果唔系咁快派晒，真系好想拎多份留念喇。
扫描本文章到手机浏览
扫描关注新时社官方微信
